No realiserer vi ei helseklynge i Sogn og Fjordane
25 interessentar står klare til å vere med på realisere ei helseklynge saman med Høgskulen på Vestlandet, Universitetet i Bergen, Sunnfjord kommune og Helse Førde.
Initiativet til å etablere helseklynga i Sogn og Fjordane kjem som eit svar på det framtidige behovet for kunnskap og nyskaping i helsesektoren. Utvikling av gode, smarte løysingar i møtet mellom helsefag og teknologi er avgjerande for å løyse oppgåvene i framtidas helsesektor. Arbeid utifrå eigne helseklynger har gjeve gode resultat andre stader i landet.
Initiativtakarane er no klare for å utvikle ei slik helseklynge med ulike næringslivs-, kunnskaps- og kapitalmiljø saman med kommunar og frivillig sektor som sentrale drivkrefter.
– Vi ser eit stort framtidig behov for ein slik motor for å utvikle produkt og tenester i vår region, og kombinasjonen privat og offentleg samarbeid er ein arbeidsmåte alle kan tene på, seier administrerande direktør i Helse Førde, Arve Varden, som blir styreleiar i helseklynga.
Samarbeidspartane har fått på plass finansiering til eit treårig oppstartsprosjekt. Målet er å etablere ei permanent helseklynge i Sogn og Fjordane i 2028. Bak finansieringa står Vestland fylkeskommune (1,5 millionar kroner), SpareBank 1 Sogn og Fjordane/Sparebankstiftinga Sogn og Fjordane (3 millionar) pluss dei fire nemnde partane (1,8 millionar). Sunnfjord Utvikling vert prosjekteigar, og skal tilsette ein klyngeleiar.
Klyngeleiaren får kontor i fellesskapet til Helseforsking Sogn og Fjordane i Førde, og skaljobbe for å skape aktivitet og synleggjere heile regionen. Helseforsking Sogn og Fjordane er eit samarbeid mellom Høgskulen på Vestlandet og Helse Førde.
UiB og HVL samarbeider også om å skape grunnlag for ein framtidsretta helsecampus på sjukehus- og høgskuleområdet på Vie. Frå 2028 vil også medisinstudentar (Vestlandslegen) bli ein del av utdanningsmiljøet her. Samla vil dette styrke kompetansemiljøet og gjere Førde og regionen til ein meir attraktiv studie- og arbeidsstad.
Suksessfaktoren blir å skape relevant aktivitet og sikre god oppslutnad frå aktuelle aktørar. I tillegg til dei fire initiativtakarane, har 25 aktørar frå offentleg og privat sektor underteikna intensjonsavtalar om å ta del i etableringa.
Desse er:
